坊間有冇以《Gundam》為主題嘅腕錶？當然有，但當中大多屬於電子錶，難免少咗幾分成熟男士應有嘅認真；咁又有冇認真得黎又係以Gundam為主題嘅機械錶？呢剎那唔敢講有冇，但黎緊就一定有！因為瑞士腕錶品牌ROMAGO將會推出兩款《Gundam》限量版聯乘腕錶！

ROMAGO品牌於瑞士成立多年，但由於一直只提供定製服務，所以於大眾消費者市場上未見活躍，近年才進入大眾目光。而ROMAGO最大的特色，就是其四四方方、充滿硬朗機械風嘅骨架結構，配上堪稱艷麗又有幾分玩味嘅錶盤設計。是次與《Gundam》嘅合作獲得日本Sunrise正式授權，亦係品牌首次與日本動漫作品合作。

是次ROMAGO《Gundam》限量版聯乘腕錶總共有兩款，分別為編號RM112-BU嘅「專用高達軍事系列」，以及編號RM112-SD嘅「軍用高達軍事系列」，用通俗嘅方法去講，前者就係以元祖高達RX-78-2為主題，後者就以聯邦軍軍官，即係林友德嗰班人為主題。兩款腕錶都用上品牌標誌性嘅46.5mm鋼製錶殼，配上24mm橡膠錶帶 (附送鋼錶帶)，入面則用上瑞士自動上鏈機械機芯。

明顯地，「高達」與否係唔會影響隻錶嘅功能，所以重點就落喺兩款腕錶嘅外觀設計之上。RM112-BU採用了RX-78-2配色，藍色作為主調佈滿整個錶盤，再以紅、黃和白三色細節襯托，最搶眼嘅當然係九點小錶盤上嘅黃色聯邦標誌秒針。錶盤上亦有一層有色的透視物料，可以隱約見到底下嘅機件結構，以保持品牌一貫嘅機械感十足。另外錶圈底層加上藍色鋁圈、錶冠外側亦有藍色鋁塗層。

而RM112-SD就用上聯邦士官制服嘅「沙色」配色，配上鍍黑鋼殼，比起RM112-BU更見低調粗獷，但細看之下就會發現同樣充滿細節。九點位置嘅小錶盤依然用上聯邦標誌秒針，但就改為沙色，而且刻意選用較淺嘅沙色，與錶盤其他部份作出對比增加層次。而下層錶圈及錶冠就用上褐色鋁材。

兩款腕錶的10點位置錶側都刻有「E.F.S.F RX-78-2」字樣，藍寶石水晶玻璃錶面上亦印有「E.F.S.F Automatic」字樣。底蓋則有高達頭像浮雕以及獨立編號。據說品牌曾經考慮於RM112-SD嘅底蓋刻上「聯邦士官頭像」，個人猜測好有機會係講緊林友德個頭，若然成真其實幾好笑。

RM112-BU及RM112-SD將於香港時間12月20日下午3時於品牌官網獨家發售，售價為HK$19,800。每色限量100枚，售完即止， 高達迷不可錯過。

資料來源：ROMAGO

購買連結：
RM112-BU：https://bit.ly/3ETEKUM

RM112-SD：https://bit.ly/3ESVg7x

Facebook: Romagohk

IG：Romagohk