IWC飛行員腕錶系列（Pilot's Watches），向來憑藉型格又硬朗嘅外觀深受錶迷愛戴，當中又以同「美國海軍戰鬥機武器學校 (SFTI)」合作嘅子系列「TOP GUN」最為注目。隨住Watches and Wonders 2022錶展正式開幕，今年IWC就為TOP GUN家族再添兩款特別版配色「Woodland 森林地」及「Lake Tahoe 太浩湖」。

自從2007年IWC推出首枚結合黑色氧化鋯陶瓷錶殼及鈦金屬錶背嘅TOP GUN腕錶，「先進物料」就成為TOP GUN系列嘅重要標誌，同時賦予腕錶別具一格嘅外觀。今次嘅新成員亦唔例外，分別用上綠色及白色陶瓷錶殼，並搭配由瓷化鈦金屬（Ceratanium）製成嘅按鈕、錶冠及錶背，結合陶瓷及鈦金屬嘅優點，輕盈、抗刮耐磨、防蝕、兼抗過敏。

兩款腕錶直徑同樣為44.5mm，具備小時、分鐘、秒鐘計時功能以及日期顯示，搭載IWC自製機芯69380，能提供46小時動力儲備，每年限量生產1,000枚，兩款官方定價均為$83,900。