日本威士忌品牌「WHISKY MEW」主要銷售由日本著名威士忌收藏家「山岡秀雄」親自試出及推薦嘅威士忌，並經常與各大日本動漫作品合作推出聯乘作品。而最新嘅聯乘，就係同士郎正宗創作嘅著名Cyberpunk作品《攻殼機動隊》合作，推出聯名威士忌。

當然，用威士忌好難表現出「Cyberpunk」嘅味道，所以今次聯乘中嘅《攻殼機動隊》元素，主要都體現於個酒標之上。兩款聯乘威士忌嘅酒標都用上1995年上映、亦係將作品推向國際嘅《攻殼機動隊》首部動畫電影嘅海報。兩支威士忌亦於《攻》有所呼應。當中「Ledaig 1995」係由位於蘇格蘭Ledaig、創立於1798年嘅Tobermory酒廠，於電影上映當年釀製。帶有葡萄柚、蘋果及少量煙燻香氣；細膩麥芽、濃郁果香、苦甜適中、柔和持久餘韻風味。限量140支。售價53,900Yen（約HK$2,915）

而Secret Speyside Distillery 1997，就係由蘇格蘭Speyside地區一間神秘酒廠於1997年釀造嘅雪利桶威士忌。帶有棗、葡萄乾及馬拉斯奇諾櫻桃嘅香氣。風味乾脆、果香濃郁，帶有平衡嘅木香及辛辣感，加水後辣味更盛。限量220支。售價40,700Yen（約HK$2,200）

兩款聯乘作品都將於「WHISKY MEW」官網有售，但買家必須於1月11至15日期間進行登記，抽中先有得買。

資料來源：WHISKY MEW