首先日本第一名米，必定要知嘅係兵庫縣山田錦，號稱酒米之王。山田錦心白size夠大，外層夠硬，可以承受到較強嘅精米步合，釀出嚟嘅酒扎實醇厚，芳香四溢，平衡而典雅。十四代、黑龍，男山，腰古井、獺祭等等名酒都有用佢。

五百萬石，以日本北陸地區，包括新潟、富山、石川、福井等地方為主要產區。呢隻米由於外層無山田錦咁堅硬，磨起上嚟比較易碎，所以少強求高精步合。五百萬石嘅作品淡麗、柔和、均衡而水潤，飲落去非常舒服，所以都好受飲家歡迎架。名作有雜賀、張鶴、麒麟山、極上吉乃川等等。

美山錦，以東北長野、秋田、山形、岩手為主要產區，同山田錦相比，佢心白比較細小，不過就夠純淨無瑕，好似山頂嘅雪咁靚，所以有呢個名。主要風格都係走淡麗路線，但就更加清爽利落，輕快辛口。名作包括國士無雙、七賢、楯野川等等。

左起 : 一般米、美山錦、山田錦

雄町，以岡山縣產為主，上面講過嘅山田錦、五百萬石都係由雄町米雜交發展所得，所以算係好經典嘅日本酒米。佢近以山田錦，都係行厚實豐盈路線，不過就更加Muscular，更加硬淨且風格強烈。名作有梅乃宿、出羽櫻、玉乃光等等。

除上以上4大主流，日本酒仲有龜之尾、秋田縣嘅秋田小町、山形縣嘅出羽燦燦、新瀉縣嘅越淡麗、清森縣嘅華想等等，留待下次試酒再同大家飲返杯!