Hangover 宿醉簡單嚟講即係前一晚飲太多，第二日覺得唔舒服，(唔好鬧我講廢話住，睇埋先)，你會覺得好攰、想嘔、腸胃不適、口乾、狂燥、頭痛，對聲音敏感等等。理論上，宿醉嘅成因係身體累積咗大量嘅acetaldehyde (乙醛)，引發中毒症狀，身體開始 dehydrated (脫水)，酵素流失，有戒斷反應等等，要留意嘅係congener嘅代謝作用。除咗飲酒過量之外，飲 congener 比例較高嘅酒，宿醉反應會更強烈。

4% 啤酒或清澈嘅Vodka大約有 0.01% congener、葡萄酒、清酒大約有0.04%，一般烈酒，如威士忌、Rum酒嘅congener比例都比較高，有啲可以去到0.1至0.2%。每個人身體對congener嘅反應都唔同，有啲人會特別敏感，宿醉症狀就會更激烈。另一方面，vintage 陳年熟成過嘅酒，congener 會不跌反升，有啲甚至會增加至平常水平嘅三倍。

Acetaldehyde (乙醛)

第二日宿醉，酒精會刺激胃部黏膜，令你腸胃不適，而積聚咗嘅乙醛都令人頭痛、作嘔，而你覺得攰係因為血糖下降所引起。要對抗hangover，最好嘅做法就係休息、飲多啲水，減少體力消耗、補充水份、降低身體乙醛含量，夾硬返工去玩，你只會醉多幾日，無補於事。

預防方法，有四點 : 一、唔好飲太多酒，二、放慢飲酒速度，三，飲啲比較靚啲酒，四、休息充足。世上可能真係有酒筲箕，但唔會一年365日咁飲得，飲得太多唔會有方法救到你。放慢速度係等你身體嚟得切反應，唔好一下子飲到酒精中毒，等你feel到唔太掂就收手。飲比較靚啲酒係因為酒質純淨嘅問題，無咩雜質嘅高級佳釀真係飲多啲都無事。休息充足令你有足夠嘅精神同體力，新陳代謝能力都比較高。

希望各位可以多啲品酒，少啲酗酒，其實飲得過量，辛苦只有自己知。