Shiraz 呢隻葡萄本來源於法國，舊世界嘅稱呼之中，佢又叫Syrah，出產於法國南部嘅隆河 (Rhone) 地區。1832年，James Busby將Shiraz帶到澳洲，直至今日，Shiraz 已經發展成為澳洲種植面積最廣闊嘅葡萄品種，Penfolds Grange嘅Vintage Shiraz可以賣到去天價，已經唔是新聞。

澳洲擁有充足嘅陽光，天氣和暖且時而炎熱，種出嚟嘅Shiraz葡萄風味更為豪邁奔放，就好似坐咗輪椅十年嘅保特一般，一解放就光速奔馳，黑莓、花香、朱古力、胡椒、咖啡、煙草，酒體飽滿，口感濃厚，配搭重口味食物，更加係如魚得水，可以將酒中嘅香甜、香料味發揮得淋漓盡致。

而其中最出名嘅，就係南澳Barossa Valley嘅作品。厚實嘅酒體、濃郁水果、皮革、草本，有啲仲會具備紫蘿蘭嘅花香。其次就係Victoria 維多利亞、西澳等產品，相比起Barossa Valley，呢啲地方氣候無咁淡熱，令Shiraz比較含蓄同細緻一啲。

Barossa Valley

Shiraz嘅應用層面好廣闊，從daily wine到fine vintage嘅頂級佳釀都有，飲家們可以從較易入手嘅作品開始，慢慢一層層試上去。當然，葡萄酒嚟講，貴、老並不一定好，即使你腰纏萬貫，都不必餐餐飲first growth，總之相信自己嘅味蕾，等身體誠實地話你知自己鐘意飲乜啦。