一年一度由City’Super 搞嘅日本清酒節已經進行得如火如荼，身為清酒迷嘅我當然要為各位介紹一吓。今年有成20間酒造代表嚟到香港，呢度分享其中5間嘅作品同埋背景。呢個清酒節由即日至 13 號星期日，仲有幾日時間，唔好錯過!

山口之獺祭

呢枝享負盛名嘅清酒，由山口縣嘅櫻井家族創製。佢地嘅經營理念保守得嚟好有遠見，只用最靚嘅山田錦，齋造純米大吟釀，二割三分、三割九分，全部都贏盡掌聲。櫻井先生認為全人手洗米係最佳方法，米係自然產物，機器唔識得做細微調整，反之，佢做遠心分離嘅時候就用咗高科技過濾，酒液味道醇和甘香，最正係佢地嘅純米大吟釀價錢都好相宜。

佐賀之天山酒造

日本九洲地區其實係燒酎比較出名，不過佐賀地區平地較多，比較適合種植稻米同釀製清酒，1875年，天山酒造響呢片豐饒之地開始咗清酒事業。去到現代，莊主已經係第6代傳人，佢地不斷研發新產品，例如有氣清酒、果酒、甚至係酒粕Mask，好多都大受歡迎。至於佢地老本行清酒，使用咗佐賀天山伏流水，呢隻中硬水釀造出來嘅清酒比較有勁度，用來配佐賀和牛，係好絕嘅地酒地食。

廣島之今田酒造

呢個年代，好多領導角色都由女性擔當，連一向重男輕女嘅日本社會亦有呢種趨勢。今田酒造第5代傳人加杜氏 (釀酒師) 今田美穗就係其中嘅代表。今田酒造位於廣島縣安藝津，復耕廣島古代米種「八反草」嚟釀酒，加上當地嘅軟水，其酒「富久長」純樸溫和，餘韻輕柔舒適，以小批形式釀造，尤其能夠保持清酒的新鮮度，同廣島海產配搭就是正。

鴨方町之丸本酒造

罕見地以有機米釀酒嘅丸本酒造，佢地相信農業應回歸基本，用有機米釀酒係新趨勢。丸本酒造創立於1867年，從1987開始用自家栽種嘅山田錦釀酒，到03年種植有機米。佢地枝有機竹林酒，推出咗差唔多8年，一直係人氣酒造嘅人氣作品。第六代莊主兼杜氏丸本仁一郎用「三黃」方法令米三度營養不良而引起枯黃，令啲葉、稈唔會吸收過多養份，咁做反而會令啲米需要自我收復以維持健康，種出嚟嘅米更加有生命力，品質更好。

神奈川之泉橋酒造

酒標上有隻蜻蜓嘅就係泉橋酒造嘅作品，佢地除咗用自家種植嘅米之外，仲運用咗古法釀製嘅「生酛」酵母。「生酛」比普通酵母釀酒需要花更多時間及人手，但泉橋依然堅持係因為釀造出來的酒會更纖幼細緻，微酸感令人有開胃的感覺，並能配搭不同的食物，連暖飲嘅時候都風味十足。