呢隻萬年曆佈局非常之平易近人啦，43mm 精鋼錶殼，size 適中，唔難carry，11.47mm厚度，防水性能有30米。錶冠都係精鋼鑄造，刻有L.U.C標誌。防眩光藍寶石水晶錶鏡配搭透明拋光錶底藝。

錶盤 12 點方位一個twin window嘅大型日期顯示，緞面太陽紋自呢度散射而出。而星期、月份分別放置於9點同3點位。

當去到2月嗰陣，月份顯示嘅小錶盤就會show俾你睇係唔係閏年。6點位小秒盤，簡約易明。大型、拋光、立體嘅羅馬數字小時刻度，配襯銀色錶盤，更加典雅同有氣勢。

自動上鏈機芯，具有微型擺陀、專利雙發條盒技術，所有零件都經過手工倒角處理，表面有圓形飾紋同日內瓦波紋，經瑞士官方天文台（COSC）認證，提供到約58小時嘅動力儲存。

精鋼錶扣襯手工縫製黑色鱷魚皮錶帶，造價大約18萬，以呢個級數嘅複雜機械萬年曆嚟講，其實非常唔錯。