又唔係冷兵器時代，俾咁多把劍你都係擺架啦。錶就唔同啦，起碼你可以戴出街，仲可以保值投資。Christophe Claret 嘅 X-TERM-1 就有兩個錶款用咗大馬士革鋼 (Damascus steel) 製造，而且錶盤設計好破格，第一眼睇都未必讀到時間。

腕錶內置以陶瓷製成嘅雙滾珠軸承承托，有個傾斜30° 浮動式陀飛輪架構，備有逆行時分顯示。兩邊嘅藍寶石套管入面，有兩個以磁場控制嘅微型鏤空精鋼球體，以顯示時間。隻錶總共有兩個發條盒，分別為陀飛輪、小時、分鐘顯示提供動力。

X-TREM-1兩款白金或5N紅金配大馬士革鋼。大馬士革鋼結構統一、材質純正，耐蝕耐震。錶殼、兩個精鋼球體、時分數字刻度用色互相配合，外觀上複雜得嚟具一致性。

「白金加大馬士革鋼搭配黑色陶瓷」或者「紅金加大馬士革鋼搭配紅金 / 黑色陶瓷時間顯示」，兩個錶款同樣配搭鱷魚皮錶帶，各限量8隻。