回溯返年頭SIHH，出名玩大嘅IWC除咗有Big Pilot之外，仲有呢隻Pilot's Watch Timezoner Chronograph，一個錶殼上嘅旋轉錶圈，調較哂時針、24小時顯示、日期，簡單，直接，玩得過癮。

Pilot's Watch Timezoner Chronograph飛行員世界時區計時腕錶，IWC憑呢隻錶成為唯一鐘錶品牌，能夠以單次旋轉運動，將包括日期、24小時指針在內嘅顯示調較到另一時區。拋光黑色旋轉錶圈上面，顯示咗24個城市，從倫敦到紐約，從東京到杜拜，每個城市名稱代表一個國際時區，而每個夏時制國家都有「S」字標示。

旋轉錶圈應用咗彈簧理念，你只要響錶圈上面用力按落去，就可以轉動並調較時區。將你需要閱讀時間嘅時區，轉去12點方位再鬆手就OK。按下錶圈嘅時候，要注意施力點應該在於錶圈相對兩側，咁先可以解鎖轉動，呢個機制有效防意外誤調。

城市錶圈轉動，白色時針、黑紅色24小時顯示針、日期單位會同時跟住轉，一個動作，郁三個顯示。值得留意係黑紅色嗰枝24小時顯示，其他錶你調較完時區，好可能唔記得係朝早定夜晚，但呢隻Timezoner就唔會有呢個問題。

45mm精鋼錶殼配搭黑色錶盤、Santoni小牛皮錶帶，雙面防反光凸狀藍寶石玻璃錶鏡，錶殼總厚度為16.5mm，質感十足。IWC自家89760自動上鏈機芯，具備68小時動力儲存。