台灣受到熱烈追捧，出名性價比高嘅Singleton並無忘記香港飲家，除咗12、18年，佢地終於有多兩隻新Vintage入嚟 : 21年、25年，值得留意係呢兩枝酒並非由 Glen Ord 蒸餾廠出品，而係轉咗用Dufftown distillery，擅長玩順滑風味同口感，21、25年亦係行呢個路線嘅佳釀。

Singleton 21年，43% ABV，Single Malt用最少21年之威士忌原酒，以舊歐洲雪莉桶營造出Dufftown風味，別具深度嘅成熟果香、糖漬水果、漿果嘅味道，焦糖味、烘焙橙香，一一盡現於順滑嘅酒體之中，細味之下仲有咖啡風味，收結較為爽朗。

25年Single Malt，43% ABV，最少陳釀足25年嘅威士忌原酒，透過美國組裝 (hogsheads) 舊橡木桶，玩出不一樣嘅深度，成熟嘅威士忌永遠都係咁吸引，更多熱帶果實，草莓類果香、蘋果、熱情果香以歲月熟成，柔化成濃厚之甜蜜，流暢、醇厚，結構平衡，收結係柔和輕撫，飲落去非常之舒服。

21年可以neat或者加冰，25年要加就只可以加一兩滴水，對高年份威士忌，我地要抱有一份尊重。我地去試飲之際，全場大多都係男士，大多都讚賞25年嗰種柔和而多姿嘅風味，猶如一位美麗嘅輕熟女，有少少 (剩餘) 嘅少女可愛，又有成熟風韻，果然呢Type就最得男人心。CWB Sogo有得賣，21年大約二千三，25年就大約五千四!