繼上星期軒尼詩干邑學院，嚟緊星期六，即5月21日又將會有個世界威士忌日，俾飲家們聚首一堂，嗒返兩杯，交流吓心得。世界威士忌日都算係一個新搞作，2012年有個大學生叫Blair Bowman，好鐘意威士忌，就搞咗壇同樂日，旨在普及威士忌文化同鼓勵舉辦各類威士忌活動，久而久之，就傳到嚟香港。

過百款來自世界各地嘅Single Malt等緊你

呢個Whisky Day將會於尖沙咀海景嘉福洲際酒店嘅Tiffany’s New York Bar舉行，之前佢地搞過威士忌節，有玩開whisky嘅巴打唔會陌生。今次Whisky Day將會相當好玩，場內會有過百款來自世界各地嘅精選威士忌，台灣、法國、德國、瑞典、美國，涵蓋範圍非常廣闊，每杯$50至$80，我有預感當日應該係不醉無歸。

除此之外，Glenlivet品牌大使Murray Lang都會到場同大家交流，都係我其中一位老友，住喺香港，老婆教書 (唔知係咪秘密)，識講中文架，到時睇有無機會捉佢傾幾句。另外酒店威士忌大使John Drummond亦會同來賓分享威士忌心得。

Tiffany’s New York Bar嘅Outdoor位會劃為雪茄區，大會提供Davidoff俾你襯返啲Smoky、Peated嘅威士忌作品。場內有大型冰雕酒吧，供應即開生蠔、火腿、芝士、朱古力、威士忌蛋糕等等，酒店可能有新威士忌甜品推出，星期六我地拭目以待。

入場費$120，已經包咗一隻Glencairn威士忌日紀念酒杯，同埋一杯welcome drinks，男士們會得到Glenlivet 12，而女士們則會享受到Chivas Whisky Cocktails，當然呢個無限制嘅，睇自己口味。

時間 : 5月21日(星期六)、4pm – 9pm
地點 : Tiffany’s New York Bar
費用 : $120 入場
購票 : Tiffany’s New York Bar 有得直接買