MYKU 呢個品牌其實兩位人兄，Kuan Teo、François Hurtaud創立，後者擔任品牌嘅設計師，訂立出低調、簡約，注重天然材料呢幾個重點風格。Kuan Teo 表示 : 「我唔鐘意複雜嘢，點解要用咁多時間，將多餘而且唔會用到嘅功能擺喺隻錶上面? 我認為腕錶除咗標示時間，靚就得架啦。」

理念如此清晰，MYKU之新作係一黑、一白，用兩種唔同材質嘅石英腕錶。先講黑色嗰隻，腕錶用咗黑瑪瑙呢種玉髓去鑄造。黑瑪瑙於自然界會同奶白色嘅瑪瑙相間沉澱結晶，形成自然嘅紋理，一般會藏於矽質火山岩嘅礦結核之中。鐘意玩能量石嘅巴打，應該知道黑瑪腦素來有排憂解果嘅能力，仲可以吸取負能量，增加配戴者嘅自信。

黑瑪腦腕錶，38mm 精鋼 / 鍍金精鋼錶殼，錶盤先係用黑瑪瑙嘅地方，而指針係黃銅嚟嘅。錶鏡仍然係藍寶石水晶，搭載瑞士朗達石英機芯，配黑色意大利真皮錶帶，成件事非常之渾然天成，價錢為$899美金。

白色嗰隻其實係異曲同工，同樣係38mm精鋼 / 鍍金精鋼錶殼，但今次就用咗意大利卡拉拉大理石去做個錶盤，黃銅指針，瑞士朗達石英機芯，配啡色意大利真皮錶帶 (寫寫吓我以為自己 copy 緊上一段)，不過呢隻就比較平，只賣$799美金。有興趣嘅巴打們，可以先去佢地官網睇睇先 : www.myku.co。