荒木老師最出名係影女體，就算無玩影相，99% 男士們都會睇過佢個人風格濃厚嘅作品，女體、束縛、性、貓，嗰種藝術層次，並非一般嘅鹹濕怪叔叔可以做到。森山老師嗰黑白相就更型，粗糙、高反差，震撼力十足嘅風格令好多年輕攝影師都趨之若鶩。呢兩位鬼才先前就同 Grand Seiko 喺東京搞咗個展覽，將攝影藝術 apply 落腕錶設計之上，原來又有另一番風味。

荒木經惟 《花曲》

今年 3月 Basel 錶展，官方公佈咗 Grand Seiko Avant-Garde 呢個合作計劃，去到上月底終於都見真章。荒木經惟用咗 1997 年嘅作品《花曲》呈現出妖艷非常嘅生命力，而森山大道嘅兩隻就分別女性網襪《下高井戸のタイツ》同《三沢の犬》嘅野犬做藍本，整個繪圖並非印於錶盤之上，反而用盡咗錶帶嘅面積同長度，令攝影圖案顯示得更加完整。

森山大道 《下高井戸のタイツ》

腕錶嘅本體係 Grand Seiko 嘅黑色陶瓷限量系列（Black Ceramics Limited Collection），腕錶採用咗5層結構，全面提升強度同輕巧性，內殼係高密度鈦金屬，外層錶殼同錶圈用咗氧化鋯陶瓷，其硬度為不鏽鋼之7倍，但重量比不鏽鋼還要輕，輕巧、強硬、兼且內刮，Grand Seiko 呢隻日本國民品牌，屢有佳作，其實好值得留意。

森山大道 《三沢の犬》