Alpina 創立於 1883 年，係當年其中一間為German Kriegsmarine 製造鐘錶嘅瑞士錶廠，喺大約30年代早期，其海軍非常需要準確，可以清晰閱讀嘅鐘錶，無線通訊、運輸，軍事工程，用途極之廣泛。

但歷史告訴我們，起初軍用科技，去到後期都會變成民用 (例如GPS)，最近 Alpina 隻 KM-710 就係玩返30年代軍事懷舊feel，重溫歷史嘅足跡。

真‧30、40年代嘅錶只得 32-35 mm，現代標準嚟講的確比較細，所以 KM-710 就以「現代角度」重新闡釋，將錶殼放大至 41.5 mm，同埋配返一個現代嘅自家製機芯。

非常易讀嘅錶盤設計，6點位有個小秒盤，指針用返Super-LumiNova 塗層，夜晚睇絕無問題。精鋼製錶殼，面頭依然係熟悉的藍寶石水晶玻璃。

錶底蓋睇到自家製Caliber AL-710，134 個部件細緻地裝嵌於 30.5 x 6.3 mm 嘅空間之中，黑色三角形擺陀令人聯想起佢 1949 年Calibre 582 嘅經典設計。28,800 次震頻，提供約 42 個鐘嘅動力儲存。呢一款明顯係收藏用嘅作品，仲配埋個相當靚仔嘅木盒俾你，定價只係 2,495 歐 !