2002年係相當靚嘅年份，先前各大香檳品牌推出呢個Vintage嘅時候，每一枝都掌聲四起，經典作品一浪接一浪，行Prestige Champagne路線嘅Krug，前陣子出咗萬眾期待嘅 2002 Vintage，先係一次高潮，後有 Grande Cuvee 158th Edition，而家再玩Clos du Mesnil 版本嘅2002，驚喜不斷。

Clos du Mesnil Vineyard

Clos du Mesnil其實係指Krug嘅一個葡萄園，位於法國市鎮奧熱河畔梅斯尼(Mesnil-sur-Oger)，面積只有1.84 公頃，但喺圍牆保護之下，呢度嘅Chardonnay得到非常好嘅照顧，單一性強，能夠突顯該年嘅優勝之處。識得玩，大家可以一次過品鑑Krug 2002、Grande Cuvee 158 同 Clos du Mensil 2002，一個收成年份，3種演澤方式，就好似一首歌，用3種唔同嘅編曲演奏出嚟咁。

Vintage Wine可貴之處在於講出該年嘅故事，氣候、降雨量、收成狀況，所以每枝都不盡相同，每次舉杯輕酌，有如時光倒流，重溫或是美好，或是嚴峻嘅一年。2002年係好特別嘅年份，天氣和煦，氣候變化唔大，完美嘅天氣、土壤嘅健康狀況令葡萄變得成熟，而Clos du Mesnil嘅葡萄於9月15採收，成品之香檳果味香濃、風格優雅，口感和諧。

Krug Clos Du Mesnil 2002 散發出非常清新嘅柑橘、白色水果香味，揉合咗薄荷、桉樹、金合歡樹、白胡椒、香料，同烘焙堅果、麵包芬香，入口嘅時候味道清新活潑，和諧甜美，餘韻帶香桃、柑橘，少少雲尼拿香甜。