大型圓殼、凹槽錶圈、三岔式錶耳同太妃式指針，鐘意玩錶嘅人，好易就認到Roger Dubuis 嘅Excalibur系列，再加上佢地精湛嘅鏤空技術，演繹出充滿個性嘅 Astral Skeleton星辰鏤空，而家錶盤粒星已經變咗呢個系列嘅 Signature之一。今次佢地再玩寶石鑲嵌，將盤面變化出更多色調。

唔好以為鑲粒石好簡單，Roger Dubuis 都要用足兩年時間研究，先研發到妥善嘅技術，可於橡膠面上鑲石。喺極具彈性嘅橡膠上面裝飾寶石，必須完美掌握質料嘅準確厚度，並且利用塑性變形技術，克服物理障礙，先可以將寶石鑲嵌於覆蓋錶圈嘅橡膠模上，呢項專利技術，個名就叫「凌空之石Soft Stones in the Sky」。

3個款式嘅錶圈上面都鑲咗 60 粒長方形切割嘅寶石，分別係黑色尖晶石、紅寶石同藍寶石。呢啲石同本身黑色DLC鈦金屬非常配匹，尤其於灰黑主色之中，特別有搶眼嘅感覺。

呢3款 Excalibur Spider Skeleton Flying Tourbillon，每款限量8隻。除咗面頭2.5卡寶石嘅質料同顏色有別，腕錶其他部份都係一樣，3款同樣搭載自家RD505SQ手動上鏈機芯，可以見到7點半位嘅飛行陀飛輪、塞爾特十字架陀飛輪框架。