而家全世界都玩Pokemon Go，但我細個嘅年代無咁多電子嘢玩，喺一張畫咗迷宮嘅紙上面搵吓出路，已經可以快樂地kill好多時間。人愈大，愈發現時間好唔夠用，返工放工、OT、同朋友Hang out一吓，一日已經無幾多個鐘頭可以訓覺，更莫講話要搵時間自己輕鬆一陣。

Hautlence近排就出咗一隻Labyrinth Watch，錶盤十足十以前玩嗰啲迷宮咁，中間有一粒珠走嚟走去，終點就係6點鐘位嘅兩個洞口。最精彩係隻錶其實睇唔到時間，嚴格嚟講，佢並唔算一隻錶，只係一個可以戴喺手上嘅遊戲裝置。

現代要睇時間有好多方法，大家最常用嘅電話時間其實好準，即使Labyrinth無時間顯示，對生活都唔會構成問題。Hautlence希望用家可以停低，玩一玩，搵返細個最簡單嘅樂趣，俾返啲時間自己去玩樂。忘卻盤面時間，尋回美好光陰，噢，好似寫緊廣告Slogan咁，但對於香港人嚟講，可能係最重要嘅事情。