Kikori 雖然標明係日本產嘅威士忌，但可否用「日威」之名仍有好大爭議性。第一點係佢本身係美國加州發行嘅威士忌，不過原料係日本出產、蒸餾過程都係日本做，所以佢都可以話自己係日本作品；第二點，據報道佢原料係100% 日本米，完全無傳統麥芽嘅成份，所以就有人話佢其實唔算係威士忌。

不過，呢啲爭議可以留俾專家研究，我地作為飲家，只需要在意枝酒好唔好飲就足夠。原料嘅米產自日本九州熊本縣，火山土壤令當地嘅米擁有極好嘅品質同香氣，而水源亦取自熊本清徹而純淨嘅山水同地下水。

Kikori 調和咗3至10年，分別陳釀於美國橡木桶、歐洲雪莉桶同埋法國橡木桶嘅酒液，其中美國桶嘅比例高達80%，賦予Kikori平易近人嘅甜美風格。

據官網資料，Kikori無採用蘇格蘭威士忌常用嘅鋼製 Pot Still，而採用咗不鏽鋼蒸餾器 Stainless Still，同時保留41% ABV，乎合傳統威士忌嘅要求，最後做埋冷凝處理，令酒色更為純淨。

毫無疑問，Kikori係一隻屬於「輕鬆飲」類形嘅威士忌，行輕盈、優雅風格，仲有一點好fit初學者嘅係，Kikori售價比較平，外國都係賣緊3x~40美金，一試無妨。