話說外國人就無裝香呢個習俗，所以就算將隻酒杯設計到成支香燭咁，都唔需要學華人咁講「大吉利是」。其實呢個咁方便嘅酒杯，係專為戶外野餐而設，打完風天氣咁好，唔係唔出去同陽光玩遊戲下話。

如果用傳統酒杯，擺喺戶外草地上面有時會東歪西倒，好易倒瀉啲酒；有用膠杯或者紙杯代替，又好似唔夠生活態度。

於是一個名為Ramona Enache 嘅設計師就諗到將酒杯底直接變成針狀，深深插入地面就可以穩穩地固定酒杯。

Ramona將呢個發明命名為「POINTER」，不單止睇落去好優雅，而且簡單易用，底部嘅金屬尖端能夠應用於沙地、草地、泥地等戶外環境，插得夠穩就唔怕大風，佢地形容隻杯就好似朵花咁種咗喺土地之上，又幾配合到大自然主題喎。