唔知大家仲記唔記得，以前Smart Phone 其實都係有實體keyboard，例如一代神機HTC Desire Z，又或者現已沒落嘅BB機，好多人都鐘意親手打字嘅觸碰感，摸得到感覺係爽嘅 ! 放眼腕錶嘅世界，盤面絕大部份都係俾藍寶石水晶隔住，就算摸得到，都只係Smartwatch嘅touch mon，毫無質感，猶幸呢隻 The Bradley Watch 就係設計俾你任摸嘅。

圓形鈦金屬錶盤上面有一環凹槽，入面有一粒走動嘅鋼珠以表示分鐘，喺錶殼邊緣，底面夾住有另一環凹槽，同樣係以走珠方式運作，呢度就顯時咗小時。石英機芯控制時間運行，再透過磁力使鋼珠運行，就算你HI到粒珠走咗位，佢都會自動返去正確位置。

本身Bradley Watch係設計俾視障人士使用嘅腕錶，誰不知Kickstarter上面集資情況遠超預期，而當中絕大多數都係視力正常嘅用家，證明Bradley Watch喺主流腕錶市場仍有相當嘅吸引力。

Bradley Watch嘅設計師叫 Nick，一位哈佛讀建築嘅香港人，佢將呢隻錶命名為 Bradley 其實係想借美國前海軍Bradley Snyder，失明後仍努力練習，最終奪得殘奧金牌嘅勵志故事去勉勵他人。而家呢隻錶喺官網已經有得賣啦，款式變化眾多，可以俾大家更易配合各種場合，價錢約HK$3,000 ~ HK$,3300左右。