蘇格蘭低地威士忌酒廠Auchentoshan前排大聲疾呼，話要建立屬於威士忌麥芽嘅新秩序「The New Malt Order」，令我諗起今屆立法會何氏律師「撥亂反正」嘅選舉口號，字面意思，兩者都係現行秩序、制度唔得，所以要建立一個嶄新而合理嘅模式，咦 ? 聽落同獨派嘅革命主張好似喎，唔通威士忌界都要迎來一場革命?

Auchentoshan呢個Campaign係想號召世界各地嘅調酒師，一齊開發新限量版威士忌 : 「Auchentoshan The Bartender’s Malt」。暫時有來自 5 個國家，共240位調酒師響應呢個活動，而最終能夠參與開發嘅，只有僅僅嘅12位。240 位調酒師需要以Auchentoshan New Make Spirit 整一隻以苦味為主嘅雞尾酒，亦即係bitters，勝出作品同時會冠以官方雞尾酒「Auchentoshan&Ale」之名。

The New Malt Order，就係要打破固有傳統，敢於創新同埋突破，而呢個信念亦正正係調酒師最需要嘅特質。12位調酒師將會參與揀桶同埋酒標設計嘅工作。由調酒師主導嘅新威士忌，相信會較著重雞尾酒嘅調配，但大家咁有創意，變數甚多，所以話呢枝Auchentoshan The Bartender’s Malt真係相當之令人期待!