飲Wine嘅朋友唔知有無同感，往往飲紅酒嘅時候，會比白酒與甜酒更易有Hangover，先唔好計每一款葡萄酒嘅酒精度差別，最近就有科學研究指出，顏色較深嘅葡萄酒，會比顏色淺嘅葡萄酒更容易引致Hangover，簡單而言，即飲紅酒第二朝會死得甘啲。

研究來自澳洲珀斯National Drug Research Institute嘅Director — Steve Allsop教授。經過一系列測試之後，佢發現引致Hangover嘅其中一個關鍵元素叫congeners。Congeners可以增加酒液嘅顏色同風味，並且不止限於葡萄酒，例如干邑比伏特加擁有更多Congeners，而葡萄酒一般比無色烈酒 (Gin、Vodka) 有較多 Congeners，其中又以紅酒比白酒多。

Congeners來自釀酒嘅fermenting process，係一種對身體有害嘅副產品，當你身體吸收並處理Congeners，你可能會感到頭暈、作嘔等不適症狀，common sense，你吸收得愈多，情況會愈加劇烈。

Allsop 強調每個人對於每種元素嘅反應都唔一樣，最主要都係要睇返你飲咗幾多，同飲得幾快。Hangover其實係身體話緊你知，你之前飲得太多酒，唔該汲取教訓，下次小心。坊間好多偏方話可以舒緩Hangover，但全世界都通用嘅方法只有兩種 : 補充足夠嘅水份、有充足嘅休息，等身體嘅回復過程更快同更順利！