進念舞台劇《我們的愛情喜劇是威士忌》將於下月公演，之前同大家介紹過，劇中嘅威士忌係由蘇格蘭Single Malt名廠Glenfiddich贊助，當年佢地帶領潮流，將單一純麥威士忌嘅美好帶出蘇格蘭，搞到國際市場從Blended Whisky轉為Single Malt做主流。幾十年前嘅潮流先驅，今日再獻新猷，Experimental Series : Project XX、IPA Experiment隆重登場！

Glenfiddich PROJECT XX

「XX」係羅馬數字，20咁解，所以應該讀Project twenty，而非Project X、X。Glenfiddich首先從世界各地搵嚟20個威士忌專家 (自家品牌大師)，匯集一地，當時班友係唔知自己去做乜嘅。酒廠叫佢地喺Conval Warehouse之中，各自憑口味揀6隻酒桶，再不斷篩選、收窄範圍，直至每人揀剩一隻酒桶，以之陳釀調和成Project XX。

酒桶包括Port pipes、雪莉桶、首置波本桶等等，廿個人，各自有唔同風格口味，最終變成一枝充滿夏日水果、綿花糖味嘅香甜威士忌。酒精度47%，Non-Chill Filtered，深邃嘅黃金酒色，果香豐盈、蘋果花、布冧、啤梨，仲有平衡得十分好嘅雲尼拿、橡木桶同甘草酒香。入口嘅時候非常軟熟柔滑，頗有綿花糖之香甜，襯以烘培杏仁、肉桂香辛，仲有清爽單寧之澀味，餘韻悠長而充滿橡木桶嘅甜美。

Glenfiddich IPA Experiment

做實驗必需大膽假設、小心求證，玩威士忌亦都一樣，釀酒時踩過界玩啤酒桶一樣無問題。Malt Master Brian Kinsman邂逅Speyside Brewer Seb Jones，玩出新派威士忌味道，IPA Experiment將威士忌原液置入IPA酒桶之中，結果係獨特嘅成熟青蘋果、柑橘香氣，清新宜人，酒花構成悠長嘅香甜口感。

兩個大師走埋一齊，總係玩到啲正嘢出嚟，IPA Experiment喺各款啤酒桶入面，揀咗啤酒花味最重嗰隻，酒香飄散出柔和嘅水果氣息，清新和諧嘅青蘋果、威廉梨、新鮮草本，仲有啤酒花香，入口有好creamy嘅雲尼拿味，柑橘、啤酒花香仍然迷人，最後係香甜餘韻伴隨酒花之清新。