清酒之細緻，好多時需要一次過品鑑多款作品，每種風味先可以明顯呈現，但香港嘅清酒活動真係唔算多，搞到我呢啲Sake迷日日都引頸以盼。而嚟緊10月1號嘅日本清酒祭，酒迷就終於有機會飲返夠本。

1978年，日本將10月1號訂為「日本酒の日」；中國曆法之中，代表酒具之「酉」都排喺地支第10，而剛好該月份為收割稻米，用以釀酒嘅最佳時機，所以日本釀酒業人士習慣以每年10月1日作為「日本酒の日」，又咁啱，嗰日香港人放假，哈，唔飲都對唔住自己啦。

活動當日提供的200款清酒入面，不乏得獎同期間限定嘅名作，除咗大家好熟悉嘅獺祭、李白、澪、南部美人之外，仲有啲好似真澄夢殿呢啲，用自家研發酵母嘅特別大吟釀作品，前幾日Preview Conference只係精選咗幾家酒造，但選擇之多已經令在場嘅專業酒迷目不暇給，去到正式嗰日有成200款酒，稍不留神，實飲到不知時日。

現場會有日本傳統擊酒儀式、日本木槌年糕儀式、日本傳統舞蹈等表演項目

無論你係初學者，定Sake老手，都推薦大家去玩個由「清酒狂熱」唎酒師帶領的「清酒導賞團」，同埋「日本酒服務研究會．酒匠研究會聯合會」(SSI) 舉辦的「清酒大師班」；到時會有大師講解清酒嘅基本概念、結構，風味特性、品鑑技巧等等，報名費$250比外面嘅清酒還要平，啱哂想真正學Sake嘅朋友。

時間 : 2016年10月1日，1300 – 2100
地點 : 千禧新世界香港酒店大宴會廳
費用 : HK$198入場；每張清酒、美食券$20
購票 : cityline.com

順帶一提，門票包咗3張清酒券、一張美食券，同埋一隻Lucaris酒杯，齋計隻杯，外面買都要百幾蚊，其實相當抵玩。