自1994年起，朗格嘅Richard Lange 「Pour le Mérite」以至各個「Pour le Mérite」型號皆有一種獨特配備 — 芝麻鏈傳動系統 (fusée-and-chain)；繼早年嘅18K Rose Gold、950鉑金款，今次再推白色黃金 + 黑色錶盤其實都係提供多一個外觀、材質嘅選擇，真正嘅重點仍然係腕錶嘅頂級工藝。

芝麻鏈傳動系統可提供穩定扭力，從而令擺輪喺整個動力儲存期間保持恆定振幅。圍繞發條盒嘅芝麻鏈，經錐形寶塔輪，將主發條動力傳遞到走時輪系，以呢個方式去保持扭力不變。當隻錶完全上鏈嗰陣，芝麻鏈會拉動邊緣位較細小嘅寶塔輪，亦即係比較短嘅槓桿。反之，當主發條拉力就嚟耗盡，芝麻鏈會拉動另一較大嘅寶塔輪，即更長嘅槓桿。呢個運作原理有啲似單車嘅傳動方式，不同嘅係芝麻鏈系統嘅傳動比率並非固定，而係持續變化。

新款Richard Lange「Pour le Mérite」具有40.5毫米實心18K白色黃金錶殼，黑底錶盤搭白色羅馬數字同18K黃金鍍銠指針；內部為自家製L044.1手動上鏈機芯，有上面講過嘅芝麻鏈傳動系統，自製擺輪游絲，振頻可達每小時21,600次，完全上鏈可達到36小時動力儲存，限量218隻。