前幾日小弟有幸被邀請去新一班Hublot 2016 Watch Academy，主題當然係新錶Big Bang Broderie同Broderie Sugar Skull啦。有趣嘅係，你會喺現場見到一班成熟穩重嘅男士們，拎起針綫較剪玩起刺繡工藝！有鑒於座上大多都係鐘錶界嘅大前輩，相信各位，包括我自己，玩針綫嘅機會都係少之又少，要大家現場繡個花紋出嚟，可能比裝嵌一隻機械錶還要困難。所以我們這些寫錶佬，還是做返老本行，講返當日嗰幾隻錶啦。

真係有刺繡俾大家玩，好有心思！

Hublot 2015年首次將高級時裝上面嘅刺繡元素融入腕錶設計入面，喺製錶史，亦都係首次將網狀刺繡材質「裝入」碳纖維之中。除咗優雅性感嘅設計，今年嘅新Big Bang Broderie蘊含之技術元素亦不能小覷。刺繡部份由瑞士Bischoff公司負責，當日Bischoff設計總監Rachel De Lagenest亦有親臨香港，講解瑞士刺繡工藝嘅歷史，同埋製作Big Bang Broderie、Sugar Skull嘅理念同困難之處。

Bischoff設計總監Rachel De Lagenest

Hublot Big Bang Broderie

呢度可以講吓，中國有四大名繡，與西方刺繡，例如Bischoff嘅主要分別在於用料、針法之上。中國高級刺繡通常係用蠶絲，可以幼到零點幾毫米，材質本身就唔太夠堅韌性，唔可以好似Bischoff咁置於碳纖入面；另一點係西方刺繡多以機製，雖然一開始都係用人手繪畫設計，但去到最後都係交俾機器編織，呢度同中國嘅人手刺繡亦唔一樣，所以講Big Bang Broderie，我地係講緊西方刺繡。

Hublot Big Bang Broderie Sugar Skull

錶盤設計

今年兩款限量女裝錶，Big Bang Broderie Sugar Skull刺繡腕錶 (41mm)、Big Bang Broderie刺繡腕錶 (41mm)，盤面、錶圈、錶帶都繡有來自瑞士St. Gallen嘅美麗圖案。錶盤中間係大家好熟悉嘅墨西哥骷髏頭，一開始Hublot將骷髏主題交俾Bischoff，設計總監Rachel都不諱言呢個的確係一個難題。點樣可以將充滿死亡氣息嘅Skull，展現得既開心又具女性魅力，最後Rachel嘅答案就係Mexican Skull，同埋繽紛嘅用色。

Big Bang Broderie、Sugar Skull好容易可以配襯不同嘅高級時裝，尤其喺夾埋旗袍嘅優雅簡直係一絕，充滿時尚玩味，又不失性感、典雅，東方女性戴起嚟毫無違和感；比起玩鑽石，呢種獨特工藝更具特別嘅魅力啦！