潮流嘅嘢，每幾年就變一變；手錶嚟講，從細Case變成大 Case、從Rose Gold變精鋼、碳纖、盤面從黑、白、銀變成藍色，新鮮事年年有，追都追唔到幾多。與其走在潮流尖端，不如走在潮流側邊，玩錶都係揀自己鐘意嘅就得；正如 Oris 嘅Divers Sixty-Five出完藍面，加推新深綠色系列，淨係睇佢反潮流呢一吓已經贏唔少品牌。

原版藍色盤面

其實3月Basel登場的Blue Dial版本Divers Sixty-Five我都好鐘意，但見到佢「竟然」出綠色，又忍不住要讚揚一吓。Sixty-Five意思係復刻65年經典嘅款式，42mm 精鋼錶殼，100米防水，具旋入式錶冠、藍寶石水晶弧鏡，核心為改裝自Sellita SW 200-1嘅Oris 733自動上鏈機芯。

Divers Sixty-Five另一賣點係有多款錶帶選擇，包括傳統精鋼錶帶、黑色橡膠錶帶，仲有輕鬆方便嘅NATO織物帶，同埋比較斯文啲嘅啡色麂皮錶帶，一共4款；其中以精鋼錶帶較貴，賣緊CHF2,100，約萬六、七港幣，而其餘3款就統一賣CHF1,900，約萬五港紙。至於買藍好定買綠好? 呢啲咁政治嘅問題，都係PM我私下討論啦。