Nachtblau 午夜藍將會喺Metro neomatik、Tangente neomatik、Minimatik 3個系列以及Tetra neomatik nachtblau正方形錶款上著色，不得不承認藍色真係有種獨特魅力，眾多著名腕錶品牌都不斷出Blue Dial款，就如同宣告全世界都喜愛藍色錶盤、錶殼、錶帶一樣。不過，藍色都有分好種，你有無諗過，邊隻藍色最得你心?

於我而言，深邃之藍最具層次同神秘感，唔會過於浮誇，配搭起來份外顯出格調。藍色之於地球，可以象徵天空、海洋，一片廣闊無垠嘅浩瀚之景；之於人們又別有詩意，《有人喜歡藍》，其象徵意義大得可以拍電影。深明此道嘅NOMOS好似漸漸用藍色取代傳統黑色，我舉腳贊成，只因佢地用嘅Nachtblau可謂正確不過。

上述3個系列嘅腕錶都具備DUW 3001，NOMOS自家自動上鏈機芯，要知道入門玩機械錶，NOMOS擁有相當強大嘅性價比。機芯具NOMOS自製擒縱系統，配高溫燒製藍色游絲。厚度僅有3.2mm，德國錶著名嘅格拉蘇蒂 3/4 夾板、DUW調速系統、回火藍鋼螺絲，表面仲飾有Glashütte條紋和魚鱗紋，動力儲存約42小時。