Jaquet Droz (JD) 辨識度非常高嘅Grande Seconde系列，行簡約典雅路線，大秒針、大8字設計已經演變出多個款式，如Minute Repeater三問、Off-centered超簡潔偏心款，仲有玩跳秒嘅Deadbeat。而JD今年再呈獻一款新創作 — Grande Seconde Dual Time，品牌首次將兩地時功能融入呢個經典系列之中，舊瓶新酒，其實都可以好好玩。

JD品牌創辦人Pierre Jaquet-Droz同我一樣，非常鐘意去旅行 (OK，有邊個唔鐘意去?)，當佢外出公幹遊歷之時，兩地時間嘅概念就對佢非常重要。JD都推出過唔少travel watch，例如The Twelve Cities Ivory Enamel，以一針閱讀12個城市嘅時間、同埋Grande Heure GMT、The Time Zones。不過兩地時出喺大8字系列還是第一次。

兩個時盤互相交錯，呈現出8字幸運號碼，上方係顯示Local Time嘅時、分兩針，下方仍然有Oversize大秒針，繼續搶鏡。今次Seconde Dual Time比較複雜，下方時盤具三重功能，一為大秒盤，二為日期顯示，三為GMT第二時區時間。雖然複雜，但睇得到錶盤設計井然有序，最長嘅秒針配搭最外圍嘅60秒刻度，第二長嘅紅頭藍針指向日期，最細嘅一枝藍針指向第二時區嘅24小時藍色刻度。上下兩個時盤分別以羅馬、亞拉伯數字顯示，睇起上嚟亦唔覺得混亂。

自家Jaquet Droz 2663H24自動上鏈機芯，具抗磁場能力極高嘅矽質擺輪遊絲同擒縱叉，振頻28,800 vph，雙發條盒提供到約65小時嘅動力儲存。錶殼直徑43mm，厚度僅為13.3mm，有3款俾大家選擇，象牙色大明火琺瑯搭配Rose Gold錶殼、銀白色錶盤或縞瑪瑙錶盤配Stainless Steel精鋼錶殼，3款都係跟手工黑色鱷魚皮錶帶。