唔知大家睇咗尋日上映嘅《奇異博士Doctor Strange》未呢? 套戲最吸引我嘅，並非Doctor Strange為Marvel系列法力最強嘅角色 (World War Hulk 都係搵佢出嚟救世架咋)，而係主演嘅人係「福爾摩斯」Benedict Cumberbatch ! 呢度唔會有任何劇透，大家可以放心，錶迷喺入場嘅時候，可以留意吓啲置入式廣告，因為Doctor Strange本身就係一個錶鐘收藏家，而佢喺電影入面佩戴嘅，就係積家嘅Master Ultra Thin超薄大師系列腕錶。

電影入面，腕錶背面刻咗一句說話 : 「‘Time will tell you how much I love you’ Christine」而Christine係邊個，等觀眾自己去發掘啦。2013年，積家於現實中推出一隻自動上鏈嘅超薄萬年曆腕錶—Master Ultra Thin Perpetual，擁有一切精巧嘅功能，但仍然保持到系列嘅纖薄特質。

除咗時針、分針同中央秒針之外，腕錶還擁有 3個專門顯示萬年曆之計數器：星期顯示設於9點鐘位置，日期顯示位於3點鐘位置，而6點鐘位置則用於顯示月份。積家嘅獨家簽名位於月相顯示上方。39mm錶殼，厚度僅為9.2mm。腕錶搭載自家868型自動上鏈超薄萬年曆機芯。通過7點鐘位置嘅細小窗口，可以見到完整嘅四位數年份，錶盤結構布局非常之均衡和諧。