先要提醒各位飲家，只有法國香檳區造嘅特定氣泡酒先可以叫香檳 (Champagne)；世上其他地區，例如得德國、澳洲釀製嘅氣泡酒，都只能稱為Sparkling Wine。當然香檳有其獨特動人之處，但大家都不能忽略氣泡酒嘅優雅果香風味、細緻綿密之氣泡，與香檳相比亦不遑多讓。其中一隻我好喜愛、性價比極高嘅Sparkling Wine，就係來自澳洲嘅頂級酒莊Chandon！

Chandon最令人印象深刻嘅，莫過於佢地用傳統Pinot Noir，配合澳洲盛產嘅Shiraz，混釀成一隻氣泡紅酒，非常破格！需知道於釀製初期，釀酒師每日要以人手輕壓葡萄6次，以搾取葡萄皮上面嘅天然顏色，再以傳統Sparkling Wine手法釀造，結果先能夠做出有深紅寶石酒色，並充滿各類果香嘅Chandon Pinot Noir Shiraz。

呢枝酒擁有濃厚嘅深色漿果、成熟車厘子、黑莓、黑加侖子同埋藍莓等果香，酒體更係濃郁圓潤，入口散發出甘草、肉桂、丁香嘅味道，其細緻嘅氣泡令口感、風味變得更加明亮。單單細味品嚐，已經係一種享受，想不到Chandon最近竟然同Paul Lafayet嘅行政總廚Chef Adrien聯手，創造出兩款Chandon氣泡酒Macaron，親身試食過後，更覺得係大師級傑作，必定要開心Share！

紅色嗰款Macaron毫無疑問係用咗Chandon Pinot Noir Shiraz，Chef Adrien將酒內嘅漿果氣息融入Macaron之中，令其擁有明亮漿果甜味、豐富嘅香氣同埋酸度，食落唔會覺得太膩。而金黃色嗰款則用返經典Chandon Brut，強調咗花香同埋蜜桃嘅香甜，汽泡酒本身已經充滿新鮮水果、柑橘花香，仲有白桃、烘焙果仁等味道，變成Macaron，其甜味會變得更為濃郁，好適合嗜甜嘅巴打們！

P.S. 其實試食當日，Chandon仲搞咗一個工作坊俾一眾傳媒朋友試整，仲提供埋詳細嘅Recipe，但作為一個Typical等食嘅香港男士，我都係建議大家直接去Paul Lafayet專門店買比較好……