方框款嚟講，Bell & Ross確係做得有質感，先前推出嘅Blue Series之中就有一隻X1 Hyperstellar，玩太空探索設計，錶殼用5級鈦金屬，營造太空艙嘅堅硬質感，外方內圓嘅配搭亦見高科技儀錶盤嘅影子；今次B&R發佈嘅Instrument de Marine系列再用方框錶殼，但就轉theme玩航海儀器，既具現代感，亦充滿復古風情喎！

X1 Hyperstellar

Instrument de Marine系列

18世紀嘅航海歷史裡，船鐘多數放置於一個方形木盒內，不過時間顯示嘅部份都係圓形為主，應用於現代腕錶，亦算係映照出人類於航海事業嘅偉大成就。Instrument de Marine新品系列共3個款式，小三針BR01 Instrument de Marine、BR-X1 Skeleton Chronograph，仲有僅限量20隻嘅BR-X1 Tourbillon Instrument De Marine。

BR01可以話係當年船鐘嘅忠實重現，方形錶殼、錶圈、上鏈錶冠都由青銅製成，錶殼周邊圍上印度紅木。呢隻珍稀靚木其實都係呼應船體、桅杆、船上儀錶合嘅質料，顏色紅中帶Pink，擁有極高耐壓強度，裁成超薄片狀之後，再壓制加工上漆，可見造工非常精細，製成品具有優雅紋路同精巧嘅細粒紋。

白色漆面錶盤，搭埋羅馬數字、藍鋼指針，6點鐘位置一個小秒盤，面頭係防眩目藍寶石水晶玻璃錶鏡；腕錶搭載BR-CAL.203手動上鏈機芯，振頻每小時21,600次，提供到56小時動力儲存，限量500隻，價值HK$67,800。

另一款BR-X1 Skeleton Chronograph，錶盤上有大大個螺旋手裡劍 (鍍金鋁制30分鐘計時盤)，辨識度十分之高。45mm錶殼同樣採用紅木配搭青鋼，藍寶石水晶玻璃錶鏡略帶灰色；鏤空錶盤上嘅羅馬數字、鍍金時間刻度皆有Super Luminova夜光塗層，6點位仲有日期視窗。Skeleton之下可以清楚睇到BR-CAL.313自動上鏈機芯，X字形上板橋，振頻每小時28,800次，腕錶限量99隻，售價HK$197,400。

上板橋採用鏤空式設計，機芯運作一覽無遺，腕錶搭載一個BR-CAL.283手動上鏈飛行陀飛輪，直接安裝於主夾板之上，無跟任何板橋，增強咗視覺上嘅懸浮感。而呢個陀飛輪機芯足足有100小時，相當於4日嘅動力儲存，果然航海事業係一次長久嘅歷程，無返咁上下耐力都去唔到目的地啦！超珍稀嘅Br-X1 Tourbillon Instrument de Marine，官方售價為HK$1,295,600。