智能腕錶市場愈來愈走三極化趨勢，一，完全近似傳統腕錶，你唔細睇都唔知佢係Smart Watch；二，完全智能化，走功能完善嘅路線，最佳例子一定係大受歡迎嘅Apple Watch；但當兩者都未喺市場得到絕對領導地位嘅時候，就自然有走中間路嘅腕錶出現，例如Frederique Constant呢隻Smart Watch就睇落夠傳統，但又充份做到生活智能小助手嘅角色。

其實上年康斯登係第一家推出Smart Watch系列嘅傳統瑞士鐘錶品牌；雖然好多鐘錶Die-hard Fans甚至唔承認智能錶嘅地位，但無論如何，品牌呢種肯去改革、嘗試嘅精神，都應該值得讚賞。今年康斯登同新成立嘅瑞士MMT （Manufacture Modules Technologies Sarl）公司合作，攜手研發出新一代version 2.0嘅Frederique Constant Smart Watch，男裝嚟講共有5款俾大家揀。

點解話佢繼續係生活小助手呢，因為2.0系列可以除咗訊息、電話提示呢啲門面野，仲做到步行距離追蹤，消耗卡路里記錄、睡眠質素監察，仲有睡眠周期鬧種、健康智能輔導等等，完全係專為健康都市人而設嘅智能腕錶，有佢連Fitbit都唔駛戴啦。

新2.0比舊版睇落更具現代感，新款錶盤用咗阿拉伯數字取代傳統羅馬數字，多種顏色配搭皮錶帶，更有典雅Sporty嘅氣息。男裝腕錶配備MMT-282智能石英機芯同埋42mm錶殼，電池壽命可達4年以上。