又到聖誕，又到聖誕，唔過唔過仍需過，無論你幾Lonely都好，聖誕佳節你永遠都避不過。有拍拖嘅巴打們固之然要二人世界，若果你有幸單身，過節嘅最好方法梗係搵齊班Single嘅朋友開P啦！咁我都知咁高興嘅日子，唔飲返兩杯酒，點對得住自己呀！？但飲還飲，千其唔好學呢個鬼佬咁，一嘢吹哂成枝威士忌，有咩後果？自己睇下就知（慎入）

片段來自Ernest Acosta嘅Youtube Channel，呢個藝高人膽大 (玩命) 嘅Texas鬼佬，真係乜都吹得一餐，從威士忌、伏特加等烈酒，到學生哥用嗰啲白膠漿都有，你都咪話唔得人驚！今次佢挑戰美帝Jack Daniel’s經典No.7威士忌，仲要係2L裝嘅Family Size，一開頭吹咗陣水之後，Acosta就拎起枝酒係咁灌。

一開始飲嗰陣，Acosta嘅狀態仲係游刃有餘，但漸漸開始佢就呼吸愈嚟愈沉重，因為酒精帶來嘅灼熱感覺，開始令佢嘅喉嚨、鼻腔有啲唔正常。即使中間有短暫停頓過，但Acosta始終都吹哂一枝兩公升嘅威士忌，而高潮當然隨之而來。無耐Acosta就衝入廁所反覆地嘔，可以從片段當中睇到佢乜鬼都嘔返哂出嚟。

最後佢企都企唔穩，醉倒當場。為免佢啲Youtube Fans有樣學樣，Acosta都寫到明千其唔好試，你隨時因而受傷，嚴重者甚至會死亡。提醒返大家，開Party都係一兩日嘅事，無謂為咗嗰幾個Moment搵自己條命較飛，飲到嘔飲到斷片還好，但急性酒精中毒可以好嚴重，我有朋友 (唔係我) 入過醫院，新聞亦好多飲到出事嘅例子，識玩嘅你，一定唔會玩到盡啦。

Source : Ernest Acosta Channel