飲開葡萄酒嘅巴打們，每次拎起隻酒杯，都有個慣性動作會搖一搖佢。美酒於杯中迴盪，不單止可以增加空氣接觸，有效散發更多酒香，仲可以睇下掛杯嘅情況，從而得知酒體厚度。不過飲威士忌嘅時候，搖唔搖杯就有兩派學說，即使品酒師、威士忌專業人士，對於呢個問題都有不同取態，到底至少40% ABV嘅烈酒，應唔應該搖杯呢?

主流意見可能會撐搖杯多啲，連我自己都下意識地搖一搖先聞。威士忌搖杯確實有其用處，與紅酒一樣，威士忌都可以睇掛杯，高年份作品酒精度多數更高，酒液粘性更大，更重身，酒淚流動速動會比較慢，所以威士忌睇掛杯，都可以判斷ABV嘅高低，從而推論威士忌嘅年歲。

另一重點，搖杯有助散發酒香，我地成日講Evaporation，飲威即使唔搖杯，啲香味都會散溢於空氣之中，搖動只係加速個過程。而市面上某啲Whisky Tasting Glass係專門設計嚟俾飲家搖杯，例如The NEAT Glass喺杯肚就有好大空間俾威士忌「活動」同埋「抖氣」，另外Nolan Glass亦有個特別設計嘅空間，俾飲家有更大嘅空間去搖杯。

The NEAT Glass

Nolan Glass

不過，反對派則形容，Evaporation過程之中，有香味亦有強烈嘅酒精味。威士忌與葡萄酒最大嘅分別，在於酒精度存在極大分野，普通蘇威40% ABV，而Non-Chill Filtered、Cask Strength系列作品可以去到5X-6X%，有人認為如果再搖杯，強烈嘅酒精味會掩蓋本身嘅酒香，甚至會刺激到你嘅鼻腔，聞香之時，反而有不適嘅感覺。

無論你支持定反對搖杯，都要緊記葡萄酒氧化速度、變化比烈酒要快得多，而搖杯都只係幫助Evaporation，並非改變酒液嘅本質。坊間好多課程都主張大家搖 or not 搖，不過講到尾，飲酒都係睇自己，搖唔搖，搖幾耐，搖幾快，聞到幾多香味，都係自己先知，試過你就知點做先最啱飲，但無可否認，搖一搖隻杯，可以令你睇落Pro好多嘅！

Source : Thewhiskeywash