返咗幾日工嘅巴打們，唔知大家從農曆新年嘅假期清醒過嚟未? 一如既往，各位放假嘅時候，想必一定喺長輩嘅陪同 / 強迫嘅情況下，食咗好多肥膩煎炸嘢，好食還好食，但食得太多，都想食返兩餐清淡啲去平衡一下。肉可以少食，但靚酒點可以少飲?! 其實做Vegetarian都可以有好標準嘅Wine Pairing，最近Wine Folly就教啲酒迷用最基本嘅Taste Profile去拆解配酒嘅理念，一齊睇下呢個總表先 :

Wine Folly嘅Pairing原則係將酒、食物拆分成各種味道 (Taste Profile)，例如甜、酸、苦、鹹之類，再搵返適當嘅配對去做返個平衡。以一枝Full-bodied嘅紅酒為例，一般而言最明顯嘅味道有 : 顯著嘅酸度 (Acid)、重單寧嘅苦澀味 (Bitterness)、高強度 (Intensity Level)，仲有一堆深色水果香氣 (Base Flavors)，同煙草香料氣息。

面對酸度Acidity、Sourness，通常會用返少少鹹味、油脂味拎返個平衡。想像一下食沙律嗰陣，都會加返啲鹽、油去控制咁強嘅酸度，其實Wine Pairing嘅道理都係一樣，如果枝葡萄酒或食物都係以酸味為主調，記得加返啲Salt、Fat嘅味道落去，否則真係酸到打冷震架。

飲得紅酒，就一種有苦澀味 (Bitterness Astringency)；呢種口腔內嘅Dry Sensation都係好多人鐘意飲紅酒嘅原因。要平衡苦澀味就會複雜少少，我地最好喺Pairing入面，加入以油脂味為主，並輔以鮮味 (Umami)、Proteins 元素嘅食物。有啲飲家可能會偏好用甜味嚟控制苦澀，不過遇到高單寧嘅葡萄酒時，就多數唔建議咁做。

了解完枝酒，就到食物嘅部份：素食者可以選擇嘅Proteins Food例如豆腐、藜麥、豆類食物多數都比較淡口，有時難以配襯高強度、厚身紅酒，所以做Wine Pairing嗰陣，要更注意食物嘅調味同配搭。要增加食物嘅Intensity，具有油脂味、鮮味嘅素食材料就多的是啦，蘑菇類、豉油、花生醬、椰奶，仲有各式各類嘅油。最後根據返枝Wine嘅特別風味，用返胡椒、醋、肉桂、香料等等合適嘅調味，屬於Vegetable，呀唔係，係Vegetarian嘅Wine Pairing菜單就大功告成啦！

Source : Wine Folly