每逢重要時刻、開心Moment，都必定要有枝靚酒先覺得盡興嘅! 一年一度嘅情人節，要令女伴覺得你又型棍又體貼，識得揀一枝啱飲嘅紅酒，再表現埋淵博嘅葡萄酒知識，肯定令你嘅佳節事半功倍。不過，葡萄酒易學難精，要一時三刻拎個PHD係無乜可能架啦，巴打們唔駛驚! 睇實MenClub為你介紹嘅靚酒，做一晚專家不是問題!

首先為你送上嘅係Wine Pairing好常用嘅紅酒篇，呢3枝作品有平有貴，從$300至$3,000都有，希望Fit到巴打們嘅預算；如果你女伴好識酒，見你揀到枝靚嘢，肯定加一百分，如果你女伴對葡萄酒無乜研究，呢3枝酒嘅風味都好突出，香甜、舒服，素人飲落都必然讚賞有加，所以兄弟們，放心去馬吧 !

Château Palmer, Margaux 2005 ($3,300)

第一枝高價嘅作品，喺來自法國波爾多嘅名莊Palmer。之前MenClub已經介紹過Palmer嘅1999年，喺漫畫《神之水滴》入面扮演第二使徒嘅角色，以Cabernet Sauvignon破紀錄嘅甜度著稱。其實Palmer嘅唔同年份，都係清一色由Cabernet Sauvignon、Merlot、Petit Verdot，3種葡萄混釀，只係每年嘅比例有少少出入。Vintage 2005 有53% Cabernet Sauvignon, 40% Merlot同7% Petit Verdot，酒香非常濃厚而集中，皮革、煙草、香料、櫻桃、蜂蜜、紫羅蘭花香，伴隨十份豐盈嘅果香，層次豐富、極具複雜性，入口能夠感受到個性鮮明嘅單寧，酒體結構完整而柔滑，Powerful得嚟亦好舒服，Balance極之出色。提配大家，開呢類作品一般都需要較多時間醒酒抖氣，最好慢慢細味品嚐啦。

Sena 2012 ($900)

智利酒王Sena嘅一款絕靚年份，亦係我心目中一直嘅超值之選。著名酒評人James Suckling俾佢98分，並形容為Sena歷年以來嘅最佳作品，相當迷人。酒香充滿誘人嘅黑莓、甘草、檀香氣息，慢慢演化成為煙草之香薰，從中亦能感受絲絲水果香甜；入口時，葡萄酒酒體飽滿，極具層次，絕妙圓潤嘅單寧帶來意想不到嘅平衡口感，柔滑、清新之感令你想像唔到一枝2012年嘅紅酒可以做到呢個地步 ! 悠長而舒服嘅Aftertaste、強調整體性嘅平衡度，使得Sena呢枝2012一直係各大葡萄酒飲家嘅最愛，新世界嚟講，真係無得彈!

Chevalier de Lascombes 2012 ($330)

如果你想揀一枝平、靚、正嘅紅酒，其實二軍莊、副牌，例如Palmer嘅第二個我「Alter Ego de Palmer」、Chateau Lascombes嘅「Chevalier de Lascombes」都係上佳選擇，一來佢地有法國頂級靚莊嘅名氣同技術，二來又可以用較低嘅價錢入手，性價比之高，真係捨他其誰。來自Margaux地區嘅Chevalier de Lascombes出名花香味濃，十分輕柔，本身已經好適合女士們品嚐，而2012年呢個Vintage喺輕柔之中，又帶有少少硬身嘅感覺，我會形容佢係剛柔並濟，男女都啱飲。呢類價格比較親民嘅紅酒亦有一個好處，就醒酒需要較少，莫待熱情冷卻，即時享受!

銷售點 : Liquid Gold 至醇酒庫