咁多品牌之中，確實只有Tiffany有種特殊嘅魔力，可以令到啲女仔一見到佢隻色就心心眼。其實Tiffany嘅製錶歷史，可以回溯至1847年，佢地唔單止喺瑞士日內瓦有製錶廠，仲有推出自家陀錶同計時碼錶等作品，除咗珠寶之外，品牌嘅腕錶其實一啲都唔失禮。而我地今次介紹嘅呢對情侶錶，係中價位並充滿時尚感覺嘅Tiffany East West系列。無論你身邊嗰位女士對腕錶有無研究，只要你將呢對East West系列雙手奉上，佢都必定唔會有怨言啦!

Tiffany East West Automatic Rose Gold ($103,000)

男裝錶款係新版Tiffany East West Automatic 3-Hand，保留咗典雅嘅長方形設計，但盤面就多咗Automatic呢個字樣，同3-Hand大三針。新版機芯TCO 2558 movement係改良自Sellita SW1000自動機芯，搭載於腕錶上提供到40小時動力儲存。2015年首次推出East West系列嘅時候，其設計獨特嘅橫讀錶款已經引起極大迴響，不過當時嘅盤面較細，並由石英機芯驅動，雖然話走中性路線，但男士配戴起嚟，可能略嫌唔夠Muscular。好彩Tiffany一向都有聽取市場訴求，改咗新款自動機芯，並將盤面放大到46.5X27.5mm，加上Guilloché Finishing，放射線狀嘅斜紋令錶盤視覺上更巨大同搶眼。奢華版本配備18K Rose Gold，售價約10萬左右，如果想慳Budget，可以考慮埋不鏽鋼加藍面嘅版本。

Tiffany East West Mini Tiffany Blue (HK$29,900)

可能你會話，石英機芯都賣到3萬蚊會唔會有啲誇張呀! 兄弟，佢係Tiffany喎，女裝錶款正正係不鏽鋼加石英機芯，售價當然比上面隻Rose Gold加自動機芯平好多。37x22mm 錶殼，同樣係長方形錶盤橫睇設計，定位為Driver’s Watch，俾你喺駕駛嘅時候不必轉手都可以閱讀時間。識買嘅，當然係買擁有標誌性底色嘅Tiffany Blue版本，辨識度甚高之餘，腕錶整體亦散發時尚優雅嘅氣息，帶點可愛嘅味道，唔會過於成熟，哄女仔呢隻實無得輸啦!

Source : Tiffany Hong Kong