Bacardi Legacy 全球雞尾酒大賽去到今年已經係第4屆，而今年MenClub Raphael有幸地被邀請成為評審之一，見證住港澳區Finalists嘅誕生。呢4位調酒師將會參加今個月嘅港台澳區域賽 (連埋台灣參賽者)，然後，勝出者將會去柏林參與全球總決賽，爭取最後勝利。而家即時同巴打們睇吓代表港澳區嘅Mixiologist，各位仲可以親身去試埋佢地嘅參賽作品添！

Amanda Wan (The Envoy)

呢位來自馬來西亞嘅美女調酒師，已經喺MenClub Cocktail Tutorial展示過佢嘅參賽作品 — Constance。Amanda入行已有11年，經驗豐富，上年佢都有參賽，仲拎到港澳區Top 3嘅佳績。

佢杯雞尾酒叫做Constance，一個常見嘅女仔名，但原來在拉丁文嘅字義係解「一種意向的決心」。呢標酒表現咗鮮明、馥郁嘅調酒風格，茉莉花茶香味加入日式Wasabi之後，剛烈嘅辛辣混和幽幽嘅花香。今次參賽佢將材料比例稍稍改良，但作品之內涵依舊，同佢嘅初衷一脈相承。

Gurung Rajkiran (Zuma Hong Kong)

Gurung，通常大家都叫佢Gagan，係其中一位來自尼泊爾嘅參賽者。佢2008年起已經定居喺香港，大大話話都差唔多有10年時間。喺加入Zuma之前，佢曾經喺一間意大利餐廳工作，成個人都有少少意式浪漫風情，Gagan認為好心情喺調製好酒嘅關鍵，所以侍客嗰陣，佢特別著重氣氛。

佢嘅參賽作品係Guerrero。Gagan 希望透過自己嘅創作，分享祖輩世代承傳，一個有關堅毅嘅傳奇。佢以Bacardi Ron Carta Blanca作為基調，並加入其他豐富味道，包括熱情果、椰子，令呢款雞尾酒充滿熱帶風情同水果酸甜口味，而白色嘅外觀則表達咗佢對家鄉今後和平統一嘅祝願。

Koco Widyatno (The Ritz Carlton Bar & Lounge, Ritz Carlton Macau)

可能係最好記嘅調酒師名 : Koco，佢成為調酒師已有3年。在The Ritz Carlton bar & Lounge嘅半年入面，他比較專注於現代風格嘅調酒技藝。佢嘅哲學係以客人嘅喜好為本，做出佢地想要飲嘅心水靚酒，有時仲會從客人身上得到創作靈感。

參賽作品 : Catalans。靈感來自印尼嘅傳統文化，Koco嘅家鄉。佢用嘅材料都承載著濃厚嘅家鄉味道，分別有咖啡、玉桂同Aztec朱古力苦精。其風格令人聯想起泰羅尼亞 Rom Cremat （一種19世紀流行嘅調酒）。Koco形容兩者都用上火焰、新鮮咖啡和橙，所以有相似嘅感覺。這款雞尾酒可以暖飲或凍飲，會展現不同嘅感覺。

Timothy Ching (Bibo)

唔講大家可能唔知，Tim原來以前喺英國係讀古典音樂出身，係讀書時期做過酒吧兼職再入行，個人嘅藝術氣息真係好適合Bibo嘅風格呀！Tim認識咗呢個行業之後，佢決心要尋找更大嘅舞台追尋調酒夢。作為一位藝術學生，佢特別講究雞尾酒嘅美學細節，其調酒過程除咗好睇，仲好聽添呀。

參賽作品 : El Cuban Padre，意思即係「Father of Cuban」。Tim將古巴風格融入經典嘅Manhattan酒款，再用返冧酒代替沿用嘅威士忌。呢杯雞尾酒嘅味道洋溢順滑之香橙同咖啡氣息，配埋Bacardi Gold嘅甜香料、橡木、橘子、雲尼拿香味尤其合襯。