如果你係《Up in the Air》入面嘅George Clooney，或者係飛到有Diamond Membership嘅空中常客，穿梭於世界各國嘅不同時區，你需要一隻可靠嘅Worldtimer幫助你掌握行程業務。2017 Basel錶展，Frédérique Constant康斯登以自家機芯玩咗一隻24 Cities嘅世界時區腕錶，彷彿係叫緊各位世界公民，做隻無腳嘅雀仔一樣。

一款擺明車馬係為出Trip / Travel而設計嘅腕錶，造工非常精緻，42mm拋光精鋼三層鍍玫瑰金錶殼，加啡色紋理嘅設計令隻錶更典雅。錶盤上面有深啡色嘅世界地圖，外加印有24個主要城市名嘅外圈，6點位一個日期顯示，配合24小時顯示分辨晝夜；雖然整個盤面包含嘅資訊好豐富，但睇落唔會覺得複雜或者混亂，呢度要讚吓個佈局設計，保持到好高嘅閱讀性。