上次喺MenClub同大家分享過醒酒嘅重要性，無論你買幾錢嘅Wine，都要預返啲時間等佢Breathe；時間一向都係醒酒嘅必要元素，不過有時時間緊迫，酒癮起想即開即飲，最佳方法係用Wine Aerator，隨身醒酒器，相比起傳統Decanter，可以將飲醒酒時間大幅縮短，而 Eparé 嘅 Pocket Wine Aerator，就號稱係咁多隨身醒酒器之中，便攜性最高同最易用，無論你係紅、白酒定Port Wine，禁個制就得，十分之User Friendly。

呢碌Eparé Pocket Wine Aerator，長度同一幅太陽眼鏡差不多，實際Size為6 X 4 X 1.25吋，重量只有3oz，隨身袋完全無問題。原理好簡單，佢可以迅速將空氣注入葡萄酒之中，形成氣泡同震動，從而增加葡萄酒同空氣嘅接觸。個隨身醒酒器有3個Mode，分別係用嚟Breathe紅酒、白酒同Port酒，佢標榜自己完成一杯紅酒嘅醒酒過程只需要15秒！！

無可否認，呢類Portable Wine Aerator係非常之方便，不過葡萄酒本身Breathe得太過急促，都會好似人類咁有hyperventilation (誤)。過快、過度嘅醒酒，好容易會令葡萄酒失去原有嘅風味同個性，到時反而會本末倒置。其實眾多資深葡萄酒專家都會選擇用返傳統醒酒法，透完氣後仍然保留到原有嘅個性，但同時擁有被喚醒嘅酒香同順滑嘅口感，其層次、結構嘅轉變係急唔嚟嘅。

所以我嘅結論都係，如果你有一枝一級靚酒，最好梗係慢慢醒酒，細細品嚐，讓呢枝Vintage發揮佢真正嘅魅力。不過如果係飲普通Daily Wine，求快求爽的話，用Wine Aerator都唔係問題，講到尾都係要啱自己Palate啫。

Source : Epare.com