「嚟枝Asahi唔該!」，每次去食飯，當無特別想飲啲咩嘅時候，Asahi 啤酒都係default item；咁鐘意佢都係因為隻啤酒夠 Dry，用日文嚟講即係夠「辛口」，飲起上嚟特別爽皮。原來史上第一批Asahi Super Dry係1987年推出，至今剛好30年。除咗搵安室奈美惠同福山雅治「共演」咗一套CM之外，Asahi仲出咗隻30周年特別版，Extra Hard乾到裂開嘅版本。

上年日本Amazon公佈2016年度酒類銷售數字，銷量排行第一嘅就係Asahi Super Dry，單單喺日本本土都年賣一億箱 (係 一億呀大佬)，計埋海外銷售，Super Dry絕對係日本啤酒史上最成功嘅作品。我去日本同啲日本酒友飲嘢嗰陣，佢地都毫不猶話Super Dry係日本最好飲嘅啤酒。其實呢個系列贏係贏在 「辛口」 嘅爽快感覺，同時又有穀物嘅醇厚、辛辣、少少啤酒花嘅苦澀味，幾時飲、配咩食物都好Fit，唔怪得佢一直都人氣高企嘅。

前兩日Asahi發布安室同福山雅治嘅Extra Dry廣告，好難得日本兩大天王、天后合作共演，福山拎住結他演奏自創歌曲，而安奈就跟住跳，成個CM營造出爽快、刺激嘅感覺，用嚟配合返今次Extra Hard特別版。呢隻Extra Hard係Super Dry系列史上最高發酵度嘅作品，擁有5.5%酒精度，入口嘅時候Dry到爆炸，十分之刺激!