常言道，再珍稀、再昂貴嘅酒，最終都係要開嚟飲，仲要同一班知己酒友分享，咁先係人生！但波蘭名酒及收藏品公司Wealth Solutions就一次又一次用超珍貴嘅靚酒嚟整錶，難道隻錶有酒真係特別香？舊年Wealth Solutions搵咗號稱全球最古老，足足有250歲嘅Gaultier Cognac，置入Armin Strom製造嘅腕錶入面。今年佢地又嚟料，用上又係號稱世上最古老嘅蘇格蘭威士忌Old Vatted Glenlivet 1862嚟製錶。

呢個咁癲嘅計劃玩咗干邑 (Gautier 1762)、Rum酒 (Harewood 1780)，兩隻都係有二百幾年嘅世界級珍稀佳釀，而最新作品用上嘅Old Vatted Glenlivet 1862係由The Whisky Exchange嘅老闆、知名英國名酒收藏家Sukhinder Singh提供。呢枝「歷史文物」威士忌，上星期於波蘭H15 Boutique Hotel，喺國際公證人、威士忌專家Charles MacLean等人見證下開瓶，唔知百幾年嘅酒香有無即刻迷倒班專家呢?

今次嘅腕錶由Louis Moinet負責，佢地嘅製錶工藝當然無需懷疑，今次嘅Spirit Watch會總共出50隻俾國際收藏家搶購，40隻不鏽鋼加埋10隻紅金款式，前者賣CHF18,000 (約港幣14萬)，後者則賣CHF46,000 (約港幣36賣)，每隻錶都有幾滴超珍貴嘅Glenlivet 1862。4月8日開賣，有興趣嘅巴打們記得留意Wealth Solutions啦。