香港，其實係一個好奇怪嘅地方，奇怪在於所有帶狗散步嘅人都好有公德心，隨身帶住一疊報紙、一支清跟喺隻狗後面，實行「屎來紙擋、尿來水淹」。之但係另一邊廂，又會有好多「人」黎到香港，以唔夠廁所為借口周街屙－街邊又屙，地鐵又屙，成個商場幾百人望住佢就揀個大堂中心黎屙，有陣時究竟個係人，邊個係狗，你真係分唔清。

但無論你係人、係狗、定係連狗都不如，只要你擁有以下呢個流動廁所，就唔會再有以上嘅煩惱！

冇錯，佢就係一個可以遙控周圍走嘅屎塔，有效控制範圍大約5米，最高負載400G，除咗有啲細，可能雖然有人從旁協助瞄準之外，堪稱解決以上兩個問題嘅最佳辦法。與其用650億起高鐵，不如用啲錢大量購入呢個只係要JPY$1250 (~HKD$90)嘅流動屎塔，一見到條街上啲似人嘅狗同似狗嘅人有咩異動就一嘢隊埋佢個Pat Pat到，咁咪唔會整污糟啲地方囉！

不過唯一要注意嘅係如果屙嗰個係隻狗，咁你就應該叫個主人清咗佢；但係如果係人黎嘅，你叫佢清佢實唔肯，咁你就好應該揸住架車跟佢四圍去！廣東道又跟，銅鑼灣又跟，若然佢頂你唔順要過關你就更加要跟，「邊到黎邊黎去」嘛！