1. 「我不屬於這個世界的」

我深信唔止我一個試過搭地鐵入閘嘅時候「嘟」Q錯咗隔離個閘位。事實上無論係褲嘅後袋、地鐵部入閘機個八達通位、銀行櫃員機個入卡位、甚至連樓下阿信屋門口部飲品機個入錢位通通都喺右手面，完全冇考慮過我哋呢啲左手人士嘅心情。每次我面對住呢個情況，都覺得自己同當年由張衛健做的孫悟空一樣。

2. 「只能坐左手邊」

左手食飯對筷子會同人打交，所以當全檯人都用右手食飯，得你一個用左手嘅時候，你就會好自然被人發配邊彊。如果係方檯都仲好啲，都仲叫有兩個左邊角落比你坐下；如果係圓檯你就死囉，全方位無死角頂死哂。我就試過去飲，結果比人逼下逼下就逼咗去外圍，即係我夾隻蝦都要後排攻擊呀，我都比咗八舊水架囉！

3. 「連學校都針對我」

大學校園好興上圖呢啲鼻屎咁大粒嘅「檯」，對大部學生黎講佢嘅問題就係細，細到想放多支筆都會碌咗出去。但對左手人士除咗要面對同樣煩惱，仲要面臨一個兩難局面：我用左手寫字而張檯係我右邊，咁我究竟係成個人擰過右手面望住隔離條友上堂呀？定係搶左邊條友仔張檯黎用呢？

4. 「每次寫字都會引黎驚嘆」

無論識咗你幾多年，同班同科咗幾多次，每當你拎起支筆寫字嘅時候總有人會大叫「原來你用左手架？」嗱嗱嗱，咁都未算煩，最煩係後面嗰句：「左手寫字總明啲架喎！」

「下話？」我每次都咁答「左手寫字早死啲添！」

5. 「不解釋。」