藝術呢家嘢，真係唔需要理由，諗到就可以做。

話說日本攝影師Photographer Hal忽然有日諗到，浴室呢個咁私密嘅地方，本應係容納一個人，但如果將兩個人塞入去，應該會激發到佢嘅創作靈感，於是佢就影咗呢輯名為「Couple Jam」嘅藝術攝影。

Photographer Hal搵咗唔同身份嘅人嚟做model，做開創作嘅音樂人又有，正正常常做生意嘅人又有，脫衣舞娘都有，仲一不做二不休，直頭要佢哋扭麻花咁攬埋一嚿塞喺浴缸裏面。

咁出奇嘅影法，啲相嘅構圖梗係勁特別，而且好有超現實味道，呢個就係Photographer Hal嘅目的。不過，呢個攝影師最勁嘅，應該係氹到人幫佢影呢輯咁嘅相。

睇完我諗起：「來擁抱着我～形成漩渦～～～」