曼克頓式劏房點都好過香港？

文：MenClub 魏文青　　圖：互聯網
POSTED ON 25 Feb 2015

香港地啲樓有幾貴，相信唔使我再提大家；香港政府做咗啲咩黎控制樓價、有幾有用，大家都心知肚明。反觀喺地球另一邊嘅美國紐約，政府為咗解決曼克頓上居住地方不足、房租超高嘅問題，喺2013年前市長彭博在任期間提出「My Micro NY」計劃，打破由1987年起限制所有房屋必須至少有400平方尺嘅規定，興趣高級組合劏房！

又「高級」又「組合」又「劏房」，實情即係咩黎呢？「組合」其實係指用預製件興建，簡單啲黎講就即係喺工場先起好一個個單位，去到現場再好似LEGO咁砌上去，好處係相對較為安全和快速。「高級」就係指配套齊備，因為整棟大廈會有公共會議空間、Cafe、天台花園、洗衣房、健身室、單車泊位和儲物室，喺香港黎講就算係屋苑式管理啦！

但講到尾，最重要嘅都係個單位！成棟位於曼克頓東部Kips Bay的大廈會提供55個單位，由260平方尺至360平方尺不等，但通通都係一廚一廁嘅一房單位－－「一房」可能都有誤導成份，因為嗰「一房」係一個多功能空間，其實就即係客廳睡房飯廳N合一，透過移動傢具做出不同功能。好在冇攞命窗台，但就有個小陽台。若果你係鍾意「簡約生活」嘅人，呢個「My Micro NY」其實都幾啱你。

其中22個單位會預留給低收入人士，有報導指月租最平可以唔使1000美金(約$7750港元)，其他就會按市價租出，估計租金要大約2000-3000美金，即係約$15500-23200港元。唔好睇好似好貴，未起好就已經有人打電話排隊認購。睇返網上評論成個計劃最有問題嘅就係「Kips Bay」呢個地點，好多人話嗰頭鬼咁吊腳，去最近嘅地鐵站都要行半哩路，而且附近都冇咩好餐廳同消閒地方喎！所以咪話你啲美國人唔務實囉！住劏房仲學人講方便喎你真係，有得住，住住先呀嘛！