MenClub的讀者應該都非常清楚，每當我哋的文章提到「男女關係科」，Comment裡總會冒出一句︰「首先你要……（有一個女朋友）」整你個掣！下下都係呢句，冇啲新意！雖則閣下冇女朋友係好悲哀！但做人都不能夠經常怨天尤人，你長期冇Honey，極有可能唔關個天事，而係關你自己事！如果你自問檢討過自己的外表、性格等等都冇問題，可能係你嗜好惹的禍！

有日本時尚雜誌就進行了一項調查，由259名女性讀者，選出「最不希望男朋友有的嗜好」，如果你有下面提及的興趣，分分鐘就係令你冇囡囡的關鍵！一齊睇過？！

第五名、咸食主義者(8)

日本可以話係甜品天堂，周圍都有各式各樣好味的甜點。對年輕女性而言，如果有個男人可以陪佢嘗遍甜品係件幸福的事，但如果對方唔識欣賞甜食，淨係鍾意食咸嘢，去到邊甜品店都仲想叫人畀碟咖哩飯佢食，對女仔而言，實在非常掃興及冇癮。

第四名、交通工具狂熱者(12)

男人似乎永遠都會對交通工具有種狂熱。有人愛飛機、有人愛火車、有人愛巴士……呢啲對男人而言都係一種浪漫。可惜女孩子真係完全唔會明白一嚿識郁嘅鐵究竟有咩吸引。因此每當有啲咩老火車退休、新火車啟用，交通工具狂熱者抱著崇敬的心情朝聖時，女孩子真係會覺得莫名其妙同不屑。

第三名、動漫迷(42)

動漫迷點解令女仔反感的原因好簡單，就係因為毒同宅。不過點解佢都只係得到第三名？最主要原因係：動漫漸漸成為一種潮流。就好似「吉卜力工作室」推出《風起》，就成為日本票房第一電影。其次，喜歡睇動漫的女性越來越多，當情侶間擁有共同興趣時，自然好難做出批評。

第二名、偶像迷(45票)

比起動漫迷愛上二次元少女，如果自己另一半，對住活生生的女性尖叫，實在令人更難以忍受。

第一名、賭徒(152票)

賭博會影響終生就唔使多講。由於日本周圍都係麻將館、彈珠機店等等，令唔少人玩到傾家蕩產，所以好多女孩子如果知道對方有沉迷賭博的情況，通常都唔會考慮同佢交往。