96年公牛，可能係一眾NBA迷心目中最強嘅隊伍之一。論數據，常規賽72勝10負，勝率87.8%，打破咗當年有張伯倫坐陣嘅72年湖人所創下嘅69勝紀錄；輪戰績，季後賽橫掃邁阿密熱火(3:0)、紐約人(4:1)同擁有奧尼爾嘅奧蘭多魔術(4:0)，就算決賽遇上同樣創下隊伍單季最佳成績、有「手套」Payton同Shawn Kemp嘅西岸一哥西雅圖超音速一樣以4:2輕鬆取勝；論人氣，淨係「波神」Jordan、「二哥」柏賓同「籃板王」洛文三個名排埋一齊都夠令啲老Fans(係，96年識睇NBA嘅，今時今日算老架啦)濕哂－－我講對眼。

往後兩年完成三連冠後，隨住教練「禪師」Phil Jackson(事隔一年轉任湖人教練)同Jordan再次退役、柏賓轉投火箭、洛文轉會湖人，公牛皇朝正式解散。數一數手指，96年已經係接近廿年前，咁究竟，當年嘅「皇朝」，今時今日又去哂邊？

正選中鋒：Luc Longley

澳洲出生、身高218cm、綽號「金剛」。喺98星散之後版交換到鳳凰城太陽，但其表現都不及2000年喺屋企被蠍子針咗兩下來得搶眼。之後再到紐約人效力一年，就因左足踝傷患而退役。之後就回到澳洲做籃球教練，目前係澳洲男子籃球國家隊嘅助教之一。

正選大前鋒：Dennis Rodman

七屆籃板王、七次防守一隊、兩次最佳防守球員、(可能係)NBA歷史上個頭最鬼五馬六嘅人、同櫻木花道真人藍本。98年後加盟湖人、一年後又轉往達拉斯牛仔，但就因為紀律問題而被放棄。後來轉戰ABA(美國半職業聯賽)、英國以至芬蘭聯賽。但近年最著目嘅都係佢多次訪問北韓，甚至公開表示有意執教北韓男子籃球國家隊。

正選小前鋒：Scottie Pippen

講起「二哥」，除咗關雲長我第二個諗起嘅就係柏賓。伴隨Jordan渡過兩次三連冠、為隊中第二得分主力。98王朝之後轉會火箭、與奧拉祖雲同巴克利組成黃金三角，但始終未見效果，於是又再轉會拓荒者。並且成功帶領球隊進入總決賽對上有奧尼爾同高比嘅湖人，大戰七場後敗陣。之後短暫回到公牛後退役。目前作為球隊大使兼班主Michael Reinsdorf嘅特別顧問。

正選得分後衛：Micheal Jordan

波神佐敦退役後做咗啲咩，相信唔係籃球粉都應該講得出幾樣。事實上佢98年退役之後，就成為華盛頓巫師嘅班主之一兼「籃球事宜主席(President of Basketball Operations)」。之後喺2001-2003短暫復出效力自己嘅球隊，再第三之退役專心陪屋企人、打Golf同繼續出Jordan鞋黎呃你錢。

與巫師鬧翻之後就轉為夏洛特山貓(現改名為黃蜂)嘅班主。

正選控球後衛：Ron Harper

有別於正常嘅控衛，Harper係打得分後衛出身。事實上公牛隊當時亦係為咗彌補Jordan第一次退役後留下嘅後場空缺而簽下Harper，可惜效果未如理想。Jordan復出之後，Harper成為「禪師」Phil Jackson三角戰術嘅重要一環，在公牛皇朝解散之後亦與禪師一同加盟湖人，並助球隊奪得2000、2001年總冠軍。退役曾經短暫成為活塞隊助教之一。由於其本人有口吃問題，所以退役後亦投入「National Shuttering Association」嘅工作，鼓勵其他人面對口吃問題。

最佳第六人：Toni Kukoc

克羅地亞藉嘅前鋒，與Pippen、Jordan為隊伍三大得分手。之後輾轉加盟76人、鷹隊同公鹿，於2006年退役。2009年接受髖關節手術之後開始每日打18洞高爾夫，2011年仲贏咗克羅地亞非職業高爾夫錦標賽。

後備控球後衛：Steve Kerr

Steve Kerr於93年加盟公牛，經歷過Pippen領軍嘅年代以及第二次三連冠。98年亦成為星散其中一員，加盟馬刺並且協助球隊奪得總冠軍，之後轉會拓荒者一年，退役前一年又返去馬刺再拎多次總冠軍。之後成為TNT嘅球評家，期間曾經離開擔任太陽隊總經理，之後又回到主播台。2014年成為金州勇士總教練－－冇錯，佢啱啱以教練身份又拎多次總冠軍啦！